Friday, September 28, 2007

التاج هو جانا التاج اهو جانا


التاج التاج التاج

اهو جانا التاج , التاج ده مررهولى ابو صلاح صاحب مدونه تنفيس وانا احب اشكره ع التمرريه دى

واعتذرله ع التأخير عشان بجد كنت مشغول بعمل مدونه جديده اجلوكو وكمان ده اول تاج فى حياتى التدوينيه فكل ما يجيلى تاج هافتكرك ابسط يا عم محدش قدك حد يطول هههههههههههههه

بسم الله نبداء الاجابه
لو قالولك اختار عصر من عصور مصرعلشان تعيش فيه تختار اى عصر و فى عهد اى حاكم .. واشمعنى ؟

هاختار عهد محمد على لانه هو مؤسس الدوله المصريه الحديثه وعمل حاجات كتيره اوى لمصر

وعرف ازاى يتعامل مع الشعب المصرى وكمان عرف ازاى يتدرج فى المناصب حتى تقلد السلطه

وكان بيطلقوا عليه لقب مستغربه اوى اللى هو المستبد العادل

اول اولويه فى حياتك عيلتك ولا شغلك ولا اصحابك ؟
اول اولاويه فى حياتى عيلتى واصحابى وشغلى ع الترتيب


ايه اكتر حاجه بتحبها فى رمضان ؟

لمه العيله ع الفطار دى جميله جداا

وبحب جو رمضان اوى العبادات وكده لما نتقابل انا واصحابى باذات فى العشره الاواخر ونصلى التهجد ونتسحر مع بعض بجد ونروح ع الصبح بيتبقى ايام جامده جدا , بموت فى شهر الصوم والعبادات

كمان حاجه بحبها فى رمضان الوقت والتنظيم لانى بنى ادم ملخبط جداااااا بفطر فى وقت غريب واتغدى واتعشى بمذاجى

فرمضان بيظبطلى وقتى جدا الفطار بميعاد والسحور بميعاد


اوصف ليا اجمل فطار ممكن تفطره ؟
اجمل فطار ممكن افطره مع العيله

بس اهم حاجه العصيييييييييير ثم اى اكل يجى قدامى

لان الاكل فى رمضان هو هو فى غير رمضان مش تفرق خاااااااالص


لو انت حاكم على مجموعه من الافراد هتكون عادل؟؟ طب هتعمل ايه عشان تتأكد انك حاكم عادل؟
بص يا عم يا اللى سأل السؤال انت

انا بطبيعتى بكره كام حاجه منهم واولهم الظلم وبعد كده العند والغباء

واللى اتظلم قبل كده عمره ما هايظلم حد

فان شاء الله مش هاكون ظالم وكمان هشوف فى عيونهم انى ظالم ولا لأ


اللى بيبوظ الحكام .. نفسهم؟ ولا الشعب؟ ولا الحاشيه المقربه؟

اللى بيبوظ الحكام يجى فى المرتبه الاولى الحاشيه الفاسده المقربه الخائفين على مناصبهم ثم صمت الشعب الراضى ثم يأتى الحاكم بقدسيته بعد كل ذلك


مين أكتر اعلامي مصري بتحترمه؟
مجدى مهنا


قريت ديوان عمر مصطفى صاحب بلوج تجربه " اسباب وجيهه للفرح" عن دار ملامح و لا لسه ؟؟ لو اه ايه رايك فيه؟؟

لا بس سمعت عنه كتير من مدونه دكتور زيفاجو وشفت الغلاف وتقريبا جزء من قصيده - لا تشبكيني والنبي


لو ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ايه؟
بحب الهندسه المدنيه مش عارف ليه

والاخراج اهى دى الحاجه اللى نااااااس كتير متعرفهاش نفسى اعمل دراسات حره فى الاخراج حاسس انى ليا رؤيه ممكن اعمل بها حاجه

بس انا راضى عن الشغل اللى هاتشغله ان شاء الله وحبه جداااااااااااااا كمان


ايه تانى بلد تتمنى تعيش فيها بعد مصر؟
مصر بجد مصر

مش عارف اصل انا فقرى مش هاعيش غير فيها

ولو اتفسح يعنى اروح فرنسا او اسانيا ونفسى اروح لندن

اوصف ليا ترتيبات اجمل فرح ممكن تحضره ؟
اى حد يكون عزيز عليا ساعتها اقعد اختار والبس البدله الجامده واختار الجرافته الجامده

بتراعي كلام الناس والقيل والقال؟ لو اه او لو لا قول لى ليه؟

ما بتفرقش لان كلامهم ولا بيقدم ولا بيأخر

ولو كان بيقدم او بيأخر كان زمانى انا مش انا

مش بهتم بكلامهم

صحيت من النوم ما لقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنه هتكون سعيد؟
مش هاكون سعيد خاااااااااااالص اول حاجه انا مدمن نت وما اقدرش استغنى عن الموبايل ولا الكاميرا ابدا لانى من النوع الى بحب اسجل ذكرياتى فوتوغرافيا

بس اا لو اتولدت من الاول كده هايبقه عادى بس مش ممكن تجيب واحد من 2007 وترميه باله الزمن ورا انت كده بتموته

بالمناسبه انا ليا موضوع اسمه اله الزمن سافرت و جربت الحوار ده ومعجبنيش ههههههههههههه

السعاده هى؟
السعاده هى لما تحس بالبهجه ويكون قلبك مطمن مش قلقان وتكون راضى وقنوع والسعاده بتختلف من واحد لاخر عشان مقياسه بيختلف

والسعاده دى شئ مش ملموس يعنى مش ممكن اقولك ده سعيد او ده

بس اللى اقدر اقوله لك ان السعاده تأتى عندما يرضى الله عليك وبالتالى ترضى على نفسك وبالتالى تكون سعيد

هى دى السعاده

عندك أمل ؟؟ أسبابك ؟
ياه ده انا كلى امل ودى مشكلتى فعلا متفائل على طول وكلى امل

والاسباب هي الحياه ماينفعش واحد يعيش فى الدنيا من غير بنزين وبنزين الحياه هو الامل والتفائل

لما تحب تهرب من كل شئ بتروح فين ؟
الوحده بحب اقعد لوحدى وساعات بجد اروح البحر اقعد قدامه بس مش زى المجنون بكلمه لا بكلم نفسى جنون برده صح ؟

امتى أول مره خدت فيها نفس طويل كده وقلت بينك وبين نفسك يااااه الظاهر انا فعلا كبرت ؟
من بتاع سنه كده اول ما اتلاقيت نفسى عندى 20 سنه اتخضيت جداااااا

لما بتعمل عمل خيرى بيكون ايه هو دافعك الاول ؟
دافعى الاول هو رضا الله عنى وغير كده انا ممكن اعمل خير ايه اللى يمنعنى عنه يعنى ما دام انا قادر خلاص اعمله

بتشرب سجاير ؟ لو الاجابه اه ايه شعورك لو شفت ست بتشرب سجاير ؟ وليه ؟
الحمد لله ... لا
بصراحه بضايق بس برجع اقول يعنى ايه الفرق بينها وبين الراجل الاتنين واحد وما دام انا قبلت كده للراجل يبقه اقبل كده للست يعنى من الاخر مش تفرق معايا خاااااااالص

بتعرف ايدك اليمين من الشمال ازاي ؟
ايه ده السؤال ده مادرستوش فى الكليه ... ده مقرر ده ولا ايه ؟

ع العموم بعرفها لما اجى امسك الماوس او لما اكل او لما اسلم

ايه اكتر اله موسيقيه بتحبها ؟
الجيتار ولو موسيقى عموما بحب الميكس ولما يكون معمول صح وبحب مزيكا عمرو دياب اللى بيوصفوها بمزيكا البحر المتوسط

فى رأيك ليه الذوق والنخوه اتعدموا ؟
ومين قالك انهم اتعدموا زى ما فى بنى ادمين ماعندهمش ولا ذوق ولا نخوه ولا اى حاجه فى برده ناس كلهم ذوق وكلهم نخوه

ايه الحاجه اللى لو حصلتلك تبقى سعيد قوى ؟؟؟
حاجات كتيره بتخلينى ابقه سعيده

لما احقق حاجه كنت بحلم بيها واكتر حاجه هاتسعدنى لما احقق هدفى فى الحياه

تختار يبقى عندك...ارض زراعيه ولا اجنس عربيات و لا كام عماره و لا فلوس فى البنك ؟؟؟؟
انا بحب العربيات جدا فطبعا هاختار اجنس عربيات وبالطبع فلوس بالبنك عشان لو العربيات اتخبطت هههههههههههههههههههههههههه اصلحهم

البحر و لا النيل ؟؟؟
البحر طبعا بعشقه بالذات بلليل

والنيل برده تحفه بلليل

مركب و لا طياره ؟؟
طياره

مجنون و لا عاقل ؟؟
مش عارف بس احتمال قريبا ابقه مجنون

تقرأ كتاب و لا تتفرج عليه فيلم ؟


بص انا بعشق السينما جداااااا وفى نفس الوقت بعشق قرايه الروايات جدا

بس الكتاب ليه حاجه كده بيعيشك فى جو , صعب المخرج او الممثل ايا كان يعيشهولك

بتمرر التاج لمين ؟؟؟
امرر التاج ده لمين اممممممممممممممممممم امرره لـــــــ

سدرة المنتهى , هات ودنك , عايز يتجوز , فضفضه من مجنون , الاغلبية الصامتة , جمهورية فرحات

الكلام نوعان كلام فارغ وكلام مليان

اى حد غير الناس اللى مررتلهم التاج وعايزه يتفضل مش هانقول لا

يلا كل سنه وانتم بخييييير

وخلص الكلام والسلام ختام

حسام مراد

Monday, September 24, 2007

AGLOCO™ اجلوكو مدونه جديده



AGLOCO™

اجلوكو مدونتى الجديده
زورونا واعرفوا ايه هو اجلوكو
دووووس هنا و شوفو وانضم لمجتمع اجلوكو

http://agloco-global.blogspot.com/


Thursday, September 20, 2007

بقيت عم ياهووووو

بقيت عم ياااااهووو

الحمد لله

اخويا حسن ربنا رزقه بمولود سعيد بييبى زى العسل


اسمه حسام

ادعوله
يارب يجعله عبدا صالحا مطيعا لوالديه مفيدا بلده ودينه
اللهم اميييييييييييييين



اللهم اميييييييييييييين

Tuesday, September 11, 2007

صيف ساااخن جدااا واشياء اخرى


وخلص الصيف والحر ... خلص الصيف الساخن جدا


وخلص الصيف خلص بحره ببحره بميته بزحمته بدوشته بحلاوته بملله بكل حاجه حلوه او وحشه فيه ولكن كان صيف ساخن جدا فى كل حاجه

بدايتا من السينما والافلام كانت ساخنه جدا ومنها الممل والرخم واللى مالوش لازمه برده جدا ومن صيف السينما الساخن الى الاحداث السياسيه الساخنه على الساحه المصريه
وحروب العطشانين بجراكين الميياه واجازات الوزراء فى بيسينات مارينا الممتلئ برده بالمياه شوفت الصدف !! وغيره وغيره

ونجرى جرى الوحوش على يوم 7/7/2007 هذا اليوم التاريخى فى هذا الصيف الزى اقبل مئات بل الوف وملايين الافراد والعشاق لاقامه عقد قرانهم فى هذا اليوم وايضا اقيم فى هذا اليوم ( وما اكثر ما اقيم ) اقيم الحفل الضخم الرائع لاظهار نتائج الاستطلاع الذى اقيم لاختيار عجائب الدنيا السبع فى لشبونه

ونجرى جرى الى افتتاح مستشفى سرطان الاطفال 57357 والمجهودات المبذولة من تكاتف جميع طوائف الشعب المصــ.... والخ والخ والخ الى ما اقيم ..الخ


نأتى هنا وما احلى هنا ناتى الى صدور البوم الميجا
ستار قول جيجا يا عم الهضبه الفنان بلدياتى
عمرو دياااااااااااااااااااب بووووووووووم

الليلا دى
قالوا ياما ان القمر عالى وبعيد والملايكه مستحيل تلمسها ايد وانا الليلادى كل د....
كل ده !!
ده ايه ده دا انا بكتب بوست
معذره ع الفاصل الغنائى

بجد كان صيف ملئ بالاحداث الساخنه جدا والمتنوعه جدا على كافه المجالات المختلفه فى مجتمعنا وكانت احداث صيفيه ساخنه مثل حرارته
ولن يتبقى لنا هنا سوى ذ
كر بعض ذكريات هذا الصيف

ويروح صيف ويجى صيف وفى كل صيف ذكرى تفكرنى بالصيف اللى فات باحلى حاجه مرت فيه بوقت لطيف اقعدنا فيه
بيوم جميل قدناا

اللى هو صيفى انا

دوووول حبه صور فى الصيف ده ليا ولصحابى هاضطر ارخم عليكو شويه عايز اتكلم على صيفى انا واللى حسيته فى الصيف واللى تابعته من اخبار عامه فى اى مجال فعشان كده هانهى البوست ده بصور ليا واصحابى برده فى الصيف ده بس اما الحكايات والحواديت لو اجت فرصه فى بوستات جايه ان شاء الله

صوره فى تعليق
===========
-------------------------------------

منظر عام لبورسعيد حبيبتى من فوق من

Google earth

Image Hosted by ImageShack.us

-------------------------------------------
الصيف السنه دى كان هنا وفى حتت تانيه كتير بس مش بره بورسعيد

Image Hosted by ImageShack.us

------------------------------------------
انا والعزازى واللى ورا منعرفهمش



---------------------------------------------

اوعى رجلك يابنى هانتبل ميه




----------------------------------

وبداء السبااق



.
--------------------------------

مين ده !؟



ايون صح
.
--------------------------------



.
----------------------------------------------

اخر تناكه مش عارف على ايه ده انت حافى يا اخى



.
--------------------------------------

وكمان لله ع البيسين



.
---------------------------------------

fantastic 4
ايون هما 5 بس فى واحد كان معدى قال لما اخد صوره


.
---------------------------------------

الحق دى قلبت مصارعه حره و رومانى



.
--------------------------------

يا عم ارحم الواد




البقاء لله


-------------------------------------------
----------------------------------------------

الحق دى قلبت رقص كمان





-------------------------------------------
----------------------------------------------

ايوه كده اهدى اعزازى الواد مش قدك خليك طيب كده اومال




-------------------------------------------
----------------------------------------------

ونرجع تانى للميييه

Image Hosted by ImageShack.us

-------------------------------------------
----------------------------------------------

شوف الـ ستارت ده ولا عبد اللطيف هيف فى زمانه اوعى وشك

Image Hosted by ImageShack.us

شوفتنى وانا بعمل استارت

-------------------------------------------
----------------------------------------------

وابتداء تانى السباق بس كل واحد على طريقته انا والعزاازى

Image Hosted by ImageShack.us

-------------------------------------------
----------------------------------------------



-------------------------------------------
----------------------------------------------

اوعى يا بنى هاتقع عليا




آآآىىى



-------------------------------------------
----------------------------------------------
سبونى بقه اخد فرصتى





-------------------------------------------
----------------------------------------------
محدش يعصبه يا جماعه


.



-------------------------------------------
----------------------------------------------
ياااااااااااااااااااه الجو الصبح كان حر اوى

Image Hosted by ImageShack.us

-------------------------------------------
----------------------------------------------
بقيييييييييييييت فحمه متحركه

Image Hosted by ImageShack.us

-------------------------------------------
----------------------------------------------

حسام مراد - احمد العزازى
Image Hosted by ImageShack.us

-------------------------------------------
----------------------------------------------


Image Hosted by ImageShack.us

----------------------------------
...........................................................



وخلص الصيف خلص بحره ببحره بميته بزحمته بدوشته بحلاوته بملله بكل حاجه حلوه او وحشه فيه ولكن كان صيف ساخن جدا فى كل حاجه

وكل سنه وانتم طيبين

وخلص الكلام والسلام ختام
حسام مراد

Tuesday, September 04, 2007

تذكرتين سينما و كده رضا


تذكرتين سينما وواحده كمان ويبقه كده رضا

تلك الحاله المزاجيه عندما تشاهد فيلما وتخرج وتقول كده رضا
لقد اتفقت مسبقا على ميعاد مع اثنين من اصدقائى لمشاهدة
فيلم كده رضا
تدور احداث الفيلم حول ثلاثه توائم يحملون نفس الاسم ولكن مختلفين فى الطبااع

" ولاسباب خاصه جدا سجل هندى اولاده التلاته باسم واحد وشهاده ميلاد واحده
وكبروا رضا
ولان هندى كان دايما يتخلبط بينهم سما كل واحد باسم " البرنس! بيبو! سمسم! ا

ويستمر صوت الرواى لسرد الاحداث لكى يختصر العديد من المشاهد فى دقائق قليله تمر سريعا على الشاشة
وأعطت مقدمة الراوى خلافا لاختصار المشاهد رونقا جميلا لمقدمة وصورة الفيلم عند المشاهد



بيبو! مشجع متعصب للنادى الاهلى مرح ويعشق كره القدم

البرنس! حاد الطباع يميل للعنف فى التعامل مع الاخرين ويهوى ارتداء ملابس تعبر عن شخصيه

سمسم! طيب خجول ضعيف الشخصيه يسعى جاهدا لاثبات ذاته يهوى الكمبيوتر والانترنت


وان اصعب شخصيات الفيلم من حيث الكتابه والاخراج هو بيبو! فهو ليس طيبا مثل سمسم! ولا شرير مثل البرنس! فهو فى منطقه وسط بين الاثنين ولكن احمد حلمى اجاد تجسيد الشخصيات الثلاثه ع الشاشه وكانك تشاهد 3 اشخاص

ويدور احداث الفيلم فى قالب كوميدى رومانسى حيث يقع الاخوه الثلاثه فى حب ندى
و ندى تعرفهم كشخص واحد مثلها كمثل الحارة والمنطقه المقيمين بها وتقع الكوميديا هنا بتعاملهم مع الاخرين كانهم شخص واحد

منه شلبى الدور الانثوى الوحيد ااسند اليها شخصة سهله ولا تحتاج منها مجهود فأدته على الشكل المطلوب

خالد الصاوى بالرغم من صغر حجم الدور ولكنه مؤثر جدا جدا فى الاحداث فأثبت خالد الصوى انه فنااااان بكل ما تحتويه الكلمه من معنى فقد اثبت انه كوميديان رائع وممثل يجيد تقمص اى دور يسند اليه


وأكثر ما لفت نظرى نهايه احداث الفيلم الذى وضعها احمد جلال المخرج فى اطار بوليسى بطريقه الفلاش باك فى اخر ثلث ساعه من الفيلم بالرغم من سير احداث الفيلم فى اطار كوميدى رومانسى ولكنه قبل باستحسان وما كان بنشاذ

ولكن عندما خرجت من السينما وعند تلقى اول صفعه من الهواء الساخن خارج السينما تذكرت ع الفور فيلم
Lucky Number Slevin
شعرت بتشابه الاخراج وبنفس الطريقه وبنفس سير الاحداث فى اخر الفيلم بنظام الفلاش باك
ولكن ولا قصه الفيلم ولا اى شئ متشابهه بين الفليمين فقط طريقه الاخراج !!

وفى النهايه وبشكل عام ان القائمين على هذا الفيلم من الاخراج والسيناريو والمونتاج و الجرافيك حيث صمم الجرافيك طارق رفعت بحرفيه عاليه واداء احمد حلمى كان جيدا جدا فصناع هذا الفيلم قدموا لنا فيلم يستحق المشاهده قدموا لنا رضا فى ثلاثه اشخاص البرنس! بيبو! سمسم! مختلفين شعرنا بهم كمشاهدين واستمتعنا بهم
استمتعنا بحدوتة جميلة وبفيلم رائع
كده رضا


احمد حلمى
احمد حلمى اداء جيد فنان يتطور يوم بعد يوم يعرف ما يريد يسير بخطى ثابته فى عالم السينما يتقدم يوم بعد الاخر والاهم انه لايستخف بعقليه جمهوره ولذلك فانه يحتل المركز الثانى فى الايرادات بعد فيلم مرجان احمد مرجان بايرادات تفوق ال17 ميلون جنيه فى الاسبوع الرابع فقط

انا عجبتنى شخصيه البرنس! جدا
انت عجبتك شخصيه مين بقه ؟؟

سيناريو: أحمد فهمى إخراج: احمد جلال بطولة: أحمد حلمى منة شلبى إنتاج: الباتروس والاخوه المتحدين مده الفيلم: 100 دقيقة

خلص الكلام والسلام ختام
حسام مراد